सन्दीप लामिछानेको दुर्लभ किर्तिमान, लिए १०० विकेट

नेपाल क्रिकेट टिमका पूर्व कप्तान सन्दीप लामिछानेले एक दिवसीय अन्तर्राष्ट्रिय खेलमा १०० विकेट पूरा गरेर नयाँ किर्तिमान कायम गरेका छन् ।

एसीसी प्रिमियर कपमा ओमानविरुद्धको खेलमा आज थप विकेट लिदै ओडिआई इतिहासकै दुर्लभ कीर्तिमान बनाएका हुन् ।

यसअघि यो कीर्तिमान अफगानिस्तानका रशिद खानको नाममा थियो । रशिदले ४४ खेलमा कीर्तिमान बनाएका थिए ।

रशिदको कीर्तिमान तोड्दै सन्दीपले ओडिआईमा सर्वाधिक छिटो ४२ खेलमा १०० विकेट लिने पहिलो खेलाडी बनेका हुन् । ओडिआईको दुर्लभ कीर्तिमानी आफ्नो नाममा बनेपछि सन्दीपले कीर्तिपुरस्थित त्रिवि क्रिकेट मैदान ढोगेका थिए ।