शनिबार, फागुन १९, २०८० |Sat Mar, 2024
अक्ल्याण्डको समय: १३:३८ |सिड्नीको समय: ११:३८ |काठमाडौंको समय: ०६:२३

केपी ओली ‘प्रधानमन्त्रीको भूमिकामा’ देखिने

एएनजेड खबरजनवरी २९, २०२४

काठमाडौं । नेकपा एमालेका अध्यक्ष केपी शर्मा ओलीले देशको न्याय प्रणाली प्रभावकारी नभएको बताएका छन् ।

आइतबार काठमाडौंमा आयोजित कार्यक्रममा एसिड(तेजाब_ आक्रमण पीडितहरूको कथा समेटिएको ‘नमेटिने घाउ’ चलचित्र घोषणा कार्यक्रममा बोल्दै अध्यक्ष ओलीले नेपालको न्याय प्रणाली दोषी भएपनि उसको राजनीतिक संलग्नता हेरेर फैसला हुने गरेको भन्दै न्याय प्रणाली प्रभावकारी नभएको बताएका हुन् ।

उनले भने, ‘नेपालको न्याय प्रणाली दोषी हुनुमा राजनीतिक संलग्नता हो । मानव विरुद्धको जघन्य अपराधमा सोझै सत्ता दुरुपयोग गरेर माफी दिने काम भइरहेको छ । त्यसैले यतिबेला उठिरहेको प्रश्न भनेको हाम्रो न्याय प्रणालीमाथि हो ।’

अध्यक्ष ओलीले एसिड पीडितहरूका बारेमा प्रधानमन्त्रीसँग भेटेर एउटा एजेण्डाको रुपमा नै छलफल गर्ने प्रतिबद्धता जनाए । उनले प्रावधान बनाएर मात्र एसिड विक्री वितरण गर्नुपर्नेमा जोड दिए । उनले भने, ‘एसिडपीडितहरूको बारमा प्रधानमन्त्रीसँग भेटेर कुरा गर्नेछु । एउटा एजेण्डाको रुपमा नै छलफल गर्नेछु । एसिडको उपलब्धता नै हुनुहुँदैन भन्ने होइन् तर कसले के प्रयोजनको लागि किन्ने र कति मात्रा प्रयोग गर्ने र बाँकी रहेको फिर्ता गर्नेसहित प्रावधान बनाएर विक्री गर्न आवश्यक छ । यो प्रतिनिधिसभाको छलफलको विषय बन्छ ।’

अध्यक्ष ओलीले एउटा निर्दोषलाई चाहीं फसाइदिने र दोषीलाई चाहीं उम्क्याइदिने काम भइरहेको बताए । त्यसैले न्याय प्रणालीमा सुधार गर्न आवश्यक रहेको उनको भनाई छ ।

एसिड आक्रमणबाट पीडित किशोरी र महिलाहरुका पीडा र जीवन कथालाई समेटर निर्माण हुन लागेको चलचित्र ओली प्रधानमन्त्रीको भूमिकामा देखिनेछन् । निर्माता रमित ढुंगानालगायतको टोलीले निर्माण गर्न लागेको ‘नमेटिने घाउ’ को शुभमुहूर्त पनि अध्यक्ष ओलीले नै गरेका हुन् ।

तपाइँको प्रतिक्रिया