शनिबार, फागुन १९, २०८० |Sat Mar, 2024
अक्ल्याण्डको समय: १४:०३ |सिड्नीको समय: १२:०३ |काठमाडौंको समय: ०६:४८

मानव तस्करको ट्रान्जिट बन्दै युरोपः नेपालमा अन्तर्राष्ट्रिय नेटवर्क सक्रिय

एएनजेड खबरडिसेम्बर ३०, २०२३

काठमाडौं । मानव तस्करहरूले पछिल्लो समय खाडीका विभिन्न मुलुक तथा नेपाल, भारत हुँदै आकर्षक रोजगारीको प्रलोभन देखाएर नेपालीहरूलाई युरोपका विभिन्न मुलुकमा पुर्याउने क्रम बढेको छ । बुधबार मात्र गैरकानुनी बाटो हुँदै नेपालीलाई स्पेन पुर्याउने गिरोहका नौ जनालाई स्पेन प्रहरीले पक्राउ गरेको छ ।

स्पेनी प्रहरीले ‘अपरेसन एभरेस्ट’ नाम दिएको कारबाहीमा सो गिरोहको स्पेनमा रहेको नेटवर्क तोडेको हो । स्पेनका प्रहरी अधिकारीहरूले म्याड्रिड र लस पाल्मासमा गरिएको अपरेसनमा नेपाली नागरिकलाई ठगीपूर्वक सेन्जेन भिसा प्राप्त गराउने काममा संलग्न रहेको आरोपमा नौ जनालाई पक्राउ गरेको हो ।

पक्राउ परेको सो समूहले नेपालबाट स्पेनको म्याड्रिड वा लस पाल्मासको भारतीय रेस्टुरेन्टमा नेपाली लैजान गैरकानुनी बाटोको प्रयोग गर्ने गरेको थियो । यसका लागि सो गिरोहले १५ हजार युरो (करिब २२ लाखबढी नेपाली रुपैयाँ)असुल्ने गरेको प्रहरीले जनाएको छ ।

यस गिरोहले ८३ जना नेपालीलाई अवैध रूपमा नेपालबाट स्पेन ल्याएको प्रमाण पनि फेला पारेको स्पेन प्रहरीले जनाएको छ । यद्यपि, सो गिरोहले भारतबाट ओसारपसार गर्नेहरूसहित ३ सयबढी नेपालीलाई गैरकानुनी बाटो हुँदै स्पेन भित्र्याएको अनुमान छ । गिरोहले थाइल्यान्ड, रसिया, पोल्यान्ड, रुमानिया वा माल्टाको सिमाना हुँदै युरोपेली क्षेत्रमा प्रवेश गराउने गरेको प्रहरीले जनाएको छ ।

स्पेनी अधिकारीहरूका अनुसार आप्रवासीहरूको उदगम देश नेपालबाट तस्करीको बाटो सुरु भएको हो । त्यहाँबाट सेन्जेन राष्ट्रका दूतावास र नेपालका लागि वाणिज्य दूतावास रहेको भारतमा नक्कली कागजात पेस गरेर आपराधिक सञ्जालले प्रणालीमा हेरफेर गरेको थियो ।

नेपाली र युरोपेली कम्पनीहरूबाट काम र अध्ययनको झूटा प्रस्तावहरूले लामो अवधिको भिसा प्राप्त गर्नका लागि आधार बनाएको छ, जसले सेन्जेन क्षेत्रमा ९० दिनभन्दा बढी बस्न अनुमति दिएको छ । भिसा प्राप्त गरेपछि, आप्रवासीहरू पोल्यान्ड र माल्टा हुँदै सेन्जेन क्षेत्रमा प्रवेश गरे र त्यसपछि तिनीहरू आफ्नो अन्तिम गन्तव्य– स्पेन पुगे ।

स्पेन आइपुगेपछि, आपराधिक सञ्जालले उनीहरूलाई भारतीय रेस्टुरेन्टहरूमा काम उपलब्ध गराएको थियो, जसको अर्थ उनीहरू झुटा रूपमा प्राप्त कागजातहरूसहित स्पेनमा बसिरहेका थिए । माथि उल्लिखितबाहेक, प्रहरीले यस नेटवर्कले नेपाली आप्रवासीहरूलाई स्पेनिस राष्ट्रियता परीक्षा उत्तीर्ण गर्न मद्दत गरेको फेलापारेको प्रहरीले जनाएको छ ।

यो अपरेसन म्याड्रिडमा दुई घरमा खोजतलास गर्दा ७ हजार ९ सय ५५ युरो नगदसहित विभिन्न इलेक्ट्रोनिक उपकरणहरू, कम्प्युटरहरू र अन्य सान्दर्भिक कागजातहरू जफत गरिएको स्पेन प्रहरीले जनाएको छ । युरोपेलीसँगको सहकार्यमा प्रहरीको अभियान सन् २०२२ मा भारतीय–केन्द्रित तस्करी नेटवर्कविरुद्धको सफल ‘क्र्याकडाउन’बाट सुरु भएको हो ।

त्यसपछिको अनुसन्धानले अधिकारीहरूलाई म्याड्रिडमा आधारित आपराधिक सेलको पर्दाफास गर्न नेतृत्व गर्यो, जुन भारत, नेपाल, लिथुआनिया र पोल्यान्डजस्ता धेरै मुलुकहरूमा शाखाहरू भएको ठूलो अन्तर्राष्ट्रिय नेटवर्कमा जोडिएको थियो । राजधानी दैनिकले समाचार लेखेको छ ।

तपाइँको प्रतिक्रिया